LAISENI, lesisita, POONI PEA 'OSI MA'U SETIFIKEITI

 MALO E LELEI

'Oku ou talitali fiefia kimoutolu kotoa 'oku me'a mai ki he peesi ni. Ko hoku hingoa ko Viula Pua Jennings pea tuku mu'a keu talanoa fekau'aki mo e hala fononga neu fou mai ai koe Tonga ne fa'ele'i pe 'i Tonga tupu hake pe ai pea u fakapaea mai ki 'Amelika ni koe fekumi ha mo'ui 'oku leleiange. 

Ko e ngaue neu manako mau pe kiai ko hono tokonii e kakai ke toe fakalakalakaange ‘enau mo’ui mo moui fiefia.  Na’a ku ha’u ki ‘Amelika ni fakafou ‘i he visa ako pea hili ‘eku ‘osi mei he Univesiti ne ma’u eku faingamalie ngofua ngaue ‘i he ta’u ‘e ua. Me’apango na’e pau keu mavahe mei he ngaue’anga ni koe’uhi ko e ‘osi e taimi ne tuku mai ‘i he‘eku ngofua ngaue. Hili e ta’u e fitu e fononga'anga faingata'a, neu ma'u faingamalie 'o u hoko koe fefine’i fonua pe sitiseni ‘i ‘Amelika ni mo e ngaahi talanoa lelei ke vahevahe. Ngaahi talanoa teu vahevahe fiefia ki heeku fanau ne nau monu’ia ‘o fa’elei ‘i ‘Amelika ni.  

Na’a ku toki liliu fonua pe kimui ni ‘a ia ‘oku kei fo’ou pe ‘eku manatu ki he natula e nofo ta’e fakalao he fonua ni. Ne u fou kotoa ai, he ngaahi tu’u laine lau houa he mala’e vakapuna i he taimi kotoa pe na’a ku foki mai ki ‘Amelika ni. ‘A e ngaahi taimi lahi ne u ‘a’ahi ai ki he ofisi DMV he feinga’i ha laiseni faka’uli pe State ID koe’uhi na’e fiema’u ma’u pe ngaahi fakamatala fakapepa ke fakamo’oni ‘eku tu’unga fakaimikuleisini. Na’e lau mahina ‘eku faingata’ia he kumi ha ki’i ngaue he ‘osi ‘eku faka’osi ako koe’uhi koe lahi e ngaue’anga ne ‘ikai ke nau fiema’u ha taha ‘oku fakangatangata ene visa ngaue. Na’e tu’o ua hono ‘ave au ki he loki faka’eke’eke ‘i he mala’e vakapuna ‘o fakafehu’ia koe’uhi ne nau ongo’i hu’uhu’u. Mou vakai ki ai ki he ngaahi faingata’a neu fou ai pea na’e hoko eku manavahe na’a tipota’i au pe te u maumau’i ‘eku visa nofo ke mo’ua kiai hoku loto mo eku fakakaukau pea neu nofo tailiili he taimi hono kotoa.

Ko e fakangatangata ‘e te hoko koe taha nofo tae fakalao he fonua ni koe taha e ngaahi lesoni lahi e moui oku ou fiefia ke a’usia. Nae hoko ko e tataki’anga ki he ngaue ‘oku ou fakahoko pea ‘oku ou ngaue ‘aonga’aki ‘eni ke tokoni ki he ni’ihi ‘oku nau foua e hala tatau. ‘Oku malava ke hoko ha’ate liliu fonua ‘i ‘Amelika ni ko e tokoni ki he tokolahi ke ‘i ai ha ta’umu’a ‘enau mo’ui mo ha ‘amanaki’anga. Ko eku tefito’i taumu’a ke tokoni’i ‘a kinautolu ‘oku nau nofo ta’e fakalao pe ‘ikai ha pepa nofo i he fonua ni ke ma’u ha faingamalie mo ha kaha’u oku leleiange ma’a nautolu mo ho nau ngaahi famili. ‘Oku ou tokoni i he founga totonu mo fakalao ke ma’u e ngaahi lelei moe faingamalie ‘o e hoko koe fefine pe tangata’i fonua i Amelika ni.